Sorgin ehiza
4. kapitulua
Iritsi dira Inkisizio Santura
zurrumurruak
Zugarramurdiko sorginkeria-zurrumurruak azkar iritsi ziren Inkisizio Santuaren belarrietara. Kontakizunek haitzuloetako akelarreak, substantzia arrotzetan gantzututako emakumeak eta kristau fedea mehatxatzen zuen deabrua aipatzen zituzten. Bailatako istorioek asaldaturik, Logroñoko inkisidoreek ekitea erabaki zuten. Gertaeren egiazkotasuna egiaztatzeko, Alonso de Salazar, bere zorroztasunagatik ezaguna zen apaiza, Nafarroako iparraldean gertatzen ari zena ikertzera bidali zuten.
Inkisizioak Zugarramurdin gertatzen zena ikertzeko gai zen norbait behar zuen, eta Alonso de Salazarrek gizon aproposa zirudien
Alonso de Salazar
Gizon metodiko bat Inkisizioaren zerbitzura
Alonso de Salazar Frías apaiz eta inkisidore espainiarra zen, eta bere metodo arduratsuagatik eta izaera erreserbatuagatik nabarmentzen zen. Inkisizio Santuari men eginez, bakoitza konpondu beharreko buru-hausgarri gisa jorratzen zuen, emozioei edo enpatiari leku gutxi utziz. Garaia eta liraina zen, eta haren eite soilak eta begirada lasaiak errespetua sorrarazten zuten, baina ez nahitaez konfiantza.
Salazarrek sakonki sinesten zuen Jainkoaren justizian, baina bere jokamoldeak urruntzen zuen bai sutsuengandik bai bihozberengandik. Zugarramurdira iritsi zenean, xehetasun handiz erreparatu zien komunitateari eta bertako ohiturei. Edabe eta akelarreen kontakizunek gehiago pizten zioten jakin-mina emakume salatuen erruarekiko fedeak baino. Herrian beldurra eta tentsioa sumatzen bazuen ere, bere interes nagusia gertaerak argitzea eta inkisidore gisa zuen posizioa sendotzea zen.
Hemen ikusten dudana ez da deabrua, baina kobazulo hauetan gertatzen ari dena susmagarria da.
Ehizaren hasiera eta izua
Hasierako ikerketa amaitu ondoren, Salazar Logroñoko Inkisizio Santuaren egoitzara itzuli zen bere txostena aurkeztera. Akusazioen benetakotasunari buruzko zalantzak zituen arren, Inkisizioak irmo jokatzea erabaki zuen. Horrela hasi zen sorgin-ehizaren prozesua, 300 pertsona baino gehiago inplikatuko zituena, eta 40 pertsona atxilotu zituzten sorginkeria egotzita. Makineria inkisitoriala martxan zegoen.
Zugarramurdin, lehenengo atxiloketek izutu egin zituzten bertako biztanleak. Jendea begiradak saihesten eta ahapeka xuxurlatzen hasi zen. Inor ez zen seguru sentitzen. Emakume seinalatuak banan-banan eramaten zituzten, eta herriko airea urduritasunez eta tentsio jasangaitzez bete zen.
Sorgina!!!
basoan ezkutatzen saiatzen naiz basoko espirutuek lagunduko didaten itxaropenarekin
baina inkisizio santuko gizonak hemen dira
Ez dago
irtenbiderik
Maria Baztan, arriskuaz jabetuta, basoan babestu zen, salaketetatik ihes egin nahian. Baina berehala aurkitu zuten. Gizon talde batek inguratu zuen haran osoan, gaua argitzen zuten zuziekin. Etsipenezko oihuak entzun ziren mendien artean, baina ez zen ihesbiderik izan. Azkenean, nekatuta eta etsita, Maria herrira eraman zuten bere patuari aurre egiteko.
